காலங்கள் மாறி மாறி, கலாச்சாரம் கலைந்து, கலங்கி கிடக்கும் இந்த நாட்களில், வாலிபர்களின் வாழ்க்கையும் கேள்விக்குறியாக நிற்கிறதே! 'வாலிபர்கள் இந்த தேசத்தின் வருங்காலம்" என இவ்வுலகத்தில் ஒரு வழக்கச் சொல் இருந்தாலும், இச்சொல், கிறிஸ்தவ உலகத்திற்கும் நன்றாகவே பொருந்தும். நம்முடைய தேசத்தில் கிறிஸ்துவை அறியாத அநேக நண்பர்கள் உடன் பயிலுவது உண்டு, உடன் பணி செய்வது உண்டு. இவர்களுக்கு முன்பாக நம்முடைய வாழ்க்கைத் தரத்தை ஒரு கிறிஸ்தவனாக மாற்றி நிறுத்தாத பட்சத்தில், நாம் மற்றொருவரை கிறிஸ்துவுக்கு நேராக வழிநடத்த இயலாதே! நம்முடைய வாழ்க்கையின் நிலை என்ன? உலகத்தோடு இணைந்து ஆசா பாசங்களுக்கும், தேவையில்லாத காரியங்களுக்கும் அடிமைப்பட்டு இருக்கிறதோ? ஆராய்ந்து பார்ப்போம். "வாலிபனே! உன் இளமையிலே சந்தோஷப்படு, உன் வாலிப நாட்களிலே உன் இருதயம் உன்னைப் பூரிப்பாக்கட்டும்; உன் நெஞ்சின் வழிகளிலும், உன் கண்ணின் காட்சிகளிலும் நட; ஆனாலும் இவையெல்லாவற்றினிமித்தமும் தேவன் உன்னை நியாயத்திலே கொண்டுவந்து நிறுத்துவார் என்று அறி" (பிரசங்கி 11:9) என்று வேதம் கூறுகிறதே. 
இன்றைய நாட்களில், அநேகர் இணையத்தில் வயது வித்தியாசம் இல்லாமல் படவரி (Instagram)) புலனம் (WhatsApp), தந்தி (Telegram), முகநூல் (Facebook), செய்தி பரிமாற்றச் செயலி (Messenger) போன்ற இப்படிப்பட்ட செயலிகளில் வீணாக நேரத்தைச் செலவிடுகிறார்கள், இதில் முக்கியமாக வாலிபர்கள் தங்கள் வேலைகளையும் மற்றும் தங்கள் பொறுப்புகளையும் விட்டு ஆன்லைனில் பல மணி நேரங்கள் கிறிஸ்தவர்களுக்கும் தகாதஇணையதளங்களைப் பயன்படுத்தி, தங்கள் இருதயங்களை பாவத்தால் கறைபடுத்துகின்றனர் மற்றும் பலர் ஆன்லைன் விளையாட்டுகளில் மாட்டிக்கொண்டுள்ளனர் என்பதையும் நாம் நன்கு அறிந்திருக்கிறோம். இன்றைய சூழ்நிலையில் இணையம் இன்றியமையாதது தான். ஆனால், அதுவே உன்னுடைய இணையாக மாறிவிட்டால், உன் வாழ்க்கையை அது இல்பொருளாகவும் மாற்றிவிடும் என்பதை மறந்துவிடாதே! அதுமாத்திரமல்ல, அது நம்முடைய அன்றாட வாழ்க்கையில் கிறிஸ்துவோடு உள்ள உறவையும் துண்டித்து, அவரது அன்பில் இருந்தும் நம்மைப் பிரித்துவிடும் என்பதில் எந்த சந்தேகமும் இல்லை. என்றபோதிலும், இன்றைய இளைய சமுதாயத்தை இணையம் இளைப்படையாமல் இணைந்திருக்க வைத்துள்ளதை இல்லையெனக் கூறிட இயலாதே...
நண்பனே, நீ எங்கே இருக்கிறாய்...?
வாலிப சகோதரனே, சகோதரியே, உன்னை நேசித்து, உனக்காக தம்முடைய ஜீவனையே கொடுத்து தம்முடைய பிள்ளையாக மாற்றின அந்த நல்ல இயேசுவை விட்டு தூரம் போய் நிற்கிறாயோ? ஜெபிக்கவோ, வேதவசனம் தியானிக்கவோ நேரம் இல்லாதவர்களாக ஓய்வில்லாமல் அர்த்தமற்றவைகளில் அகப்பட்டு, தேவனை விட்டு வெகுதூரம் சென்றுவிட்டாயோ? ஆதாமையும் ஏவாளையும் படைத்த அன்பு தேவன் தோட்டத்தில் வந்து, ஆதாமைக் கூப்பிட்டு: நீ எங்கே இருக்கிறாய் என்று அவனைத் தேடினாரே! (ஆதியாகமம் 3:9) அதே தேவன், இன்றும் உன்னைப் பார்த்து இதே கேள்வியைத்தான் கேட்கிறார்ளூ தம்பியே, தங்கையே சற்று சிந்தித்துப்பார் 'நீ எங்கே இருக்கிறாய்?" உணர்த்தவில்லையோ இன்றும் உன்னை உருவாக்கத் துடிக்கும் உன்னதரின் வசனம்? உன் உள்ளத்தை உருக்கவில்லையோ கல்வாரியில் உருக்குலைந்த உன்னதர் இயேசுவின் மரணம்?
